Penodi Pwy?
Mae’n gyfnod prysur i Eleri Wynne, wrth iddi ymgyfarwyddo â’i swydd newydd fel Swyddog Cyfathrebu Mewnol a Materion Allanol Amgueddfa Cymru a mynd ati i drefnu ei phriodas yn ei hamser sbâr!
Mae gwarchod a hyrwyddo celfyddydau a threftadaeth Cymru yn rhywbeth agos at ei chalon, ac mae Eleri yn falch o’r cyfle i rannu diwylliant a threftadaeth Cymru sy’n cael eu harddangos yn yr Amgueddfa Genedlaethol.
Dechreuodd ar ei gyrfa gyda Celfyddydau Rhyngwladol Cymru – partneriaeth rhwng Cyngor Celfyddydau Cymru a’r Cyngor Prydeinig. Yna bu’n Swyddog Datblygu gyda Celfyddydau a Busnes Cymru cyn symud i’r RSPB yng Nghaerdydd, lle bu’n gweithio fel Swyddog Cyfathrebu a Rheolwr Digwyddiadau.
Bydd yn teithio tipyn o Gymru i gwrdd â staff ym mhob un o safleoedd yr Amgueddfa, a bydd hefyd yn cydweithio â chynrychiolwyr sefydliadau a mudiadau partner trwy drefnu ymweliadau a digwyddiadau.
Un elfen bwysig o’r gwaith yw cwrdd â phobl wyneb yn wyneb, ond mae hefyd yn awyddus i ddefnyddio cyfryngau newydd mewn modd creadigol i gyfleu negeseuon ar ran yr Amgueddfa. I wir ddatblygu a thrawsnewid y byd cyfathrebu, mae Eleri yn credu y bydd angen defnyddio mwy o ffyrdd creadigol i gysylltu gyda chymunedau a’u hysbrydoli, er mwyn denu mwy o gynulleidfaoedd.
Ond beth yw ei hoff beth am y swydd? “Fel rhywun sy’n hoff o’r celfyddydau, mae gweithio mewn adeilad sy’n edrych ar ôl rhai o drysorau mwyaf gwerthfawr Cymru yn gwneud dydd arferol o waith yn ddydd i’w gofio, ac mae hi’n neis iawn gallu picied allan amser cinio i weld yr arddangosfa ddiweddaraf!” medd Eleri. “Dwi’n hoff iawn o La Parisienne gan Renoir, ac mae cerdded heibio darnau o gelf fel hyn ar fy siwrnai i’r swyddfa yn wych.”
Cafodd y swydd hon ei hysbysebu ar Golwg360.
