Bardd a chyn-fyfyriwr MPhil ym Mhrifysgol Aberystwyth yw gohebydd newydd Golwg 360.
Mae Endaf Griffiths wedi dechrau ar ei swydd ers Calan, ac mae’n mwynhau cyfuno ei ddiddordeb am hanes a llenyddiaeth â newyddiadura. Mae’n cymryd lle Megan Lewis yn swyddfa Golwg yn Llambed – pob hwyl i Megan yn ei swydd newydd yn y byd cyfieithu.
Felly, pwy yw Endaf Griffiths?
Un o ble wyt ti?
O Lansawel, Sir Gâr yn wreiddiol, ond bellach yn byw yng Nghwmsychbant, Gwlad y Cardi.
Yw hi’n bwysig i ti gael swydd adre yng nghefn gwlad?
Yn sicr, ond mae’n bwysig hefyd eich bod yn mwynhau’r gwaith ei hun.
Sut beth yw bywyd gohebydd?
Bywyd a all fod yn heriol ar adegau, ond po fwyaf yr her, y mwyaf o bleser a ddaw o’i ddatrys.
Sut wyt ti’n treulio dy amser y tu fas i’r gwaith?
Darllen, gwneud yn siŵr bod fy nghloc larwm yn gweithio, a chysgu.
Beth oedd dy hoff bwnc yn yr ysgol?
Hanes
Beth yw’r ŵyl orau i ti fynd iddi?
Gŵyl Nôl a Mlân yn Llangrannog
Beth yw dy hoff air neu ddywediad?
Awê
Pwy fyddet ti’n gwahodd i dy bryd bwyd delfrydol… a beth fyddai’r wledd?
Neb, fel fy mod yn cael y bwyd i gyd … ond o ddewis, T. Llew Jones; a’r pryd bwyd delfrydol? Cawl fel starter a stêc a tships fel prif gwrs.
Pa fath o straeon hoffet ti eu torri gyda Golwg 360?
Ar hyn o bryd, dw i’n hoff iawn o ysgrifennu straeon gwreiddiol am hanes a llenyddiaeth. Ond yn cael hwyl ar ysgrifennu straeon gwleidyddol hefyd.
Byw i weithio, neu gweithio i fyw?
Mae’r ddau’n wir, ond os ydych chi’n cael swydd yr y’ch chi’n ei wir fwynhau, yna ni fydd rhaid i chi weithio’r un diwrnod yn eich oes eto.
Beth yw dy obeithion i’r dyfodol yn y swydd?
Dysgu popeth sydd angen i newyddiadurwr wybod!
Cafodd y swydd hon ei hysbysebu yn Golwg ac ar Golwg 360.
