gan
Lowri Jones
Mae dwy swydd newydd wedi’u llenwi gan Golwg dros y misoedd diwethaf, a dyma gyfle i ddod i adnabod ein Pennaeth Masnachol ychydig yn well…
Enw a swydd:
Llion Roberts, Pennaeth Masnachol
Un o ble wyt ti?
Bachgen o Lanuwchllyn de wa!
Beth ti’n hoffi ei wneud yn dy amser rhydd?
Dwi’n hoff o edrych ar bob math o bêl-droed. Dwi’n hoff iawn o edrych ar yr hogie yn chwarae a hefyd yn dilyn y clwb lleol a Lerpwl. Diddordeb arall sydd gen i ydi darllen… am bêl-droed rhan amlaf.
Mae sôn dy fod di’n dipyn o bêl-droediwr! Ti’n dal i chwarae?
Ma rhywun wedi bod yn dweud clwyddau yn rhywle! Na, dwi ddim yn dal i chwarae rwan, henaint wedi dal fyny ma gen i ofn.
Beth yw dy rôl newydd gyda Golwg?
Y rôl newydd yw Pennaeth Masnachol. Byddaf yn gyfrifol am greu a datblygu strategaethau masnachol a gwerthu cynnwys a gwasanaethau’r cwmni a’u rhoi ar waith er mwyn cynyddu’r incwm.
Ble o’t ti’n gweithio cynt?
Gyda’r cwmni trelars Ifor Williams, fel aelod o’r tîm gwerthu.
Beth yw’r gyfrinach i werthu trelar?
Dwi’m yn meddwl bo cyfrinach, ond yn fy marn i ma hi’n bwysig bo rhywun yn onest hefo’r cwsmer ac yn barod i wrando fel eu bônt yn gallu ymddiried ynddof.
Beth wyt ti’n fwya balch o yn ystod dy yrfa hyd yn hyn?
Dwi’n meddwl mai medru sefydlu gwerthwr trelars newydd yn Sweden sydd yn rhoi fwyaf o falchder ifi. Roedd y cwmni angen gwerthwr newydd yn y wlad gan nad oedd y gwerthwr cynt yn gwerthu digon. Fues drosodd yn Sweden gwpwl o weithiau yn cwrdd â darpar werthwyr cyn dod i benderfyniad ar pwy oedd am gael ei sefydlu. Mae’r gwerthwr newydd hyn yn gwerthu cannoedd o drelars y flwyddyn erbyn hyn.
Beth ti’n edrych mlaen i’w neud yn dy swydd newydd?
Dwi’n edrych ymlaen at ymgymryd â’r her newydd a chyfarfod â phobol ar draws Cymru.
